អាជ្ញាធរជាតិដោះស្រាយវិវាទក្រៅប្រព័ន្ធតុលាការ «អ.ដ.ក.» បានសម្រុះសម្រួលផ្សះផ្សា បញ្ចប់​ដោយជោគជ័យ នូវវិវាទដីធ្លីដ៏រ៉ាំរ៉ៃ១៨ឆ្នាំ មួយករណីទៀត​

ព្រៃវែង៖ នៅថ្ងៃទី២៣ ខែសីហា ឆ្នាំ២០២៤
នេះ មន្ត្រីសម្រុះសម្រួលដោះស្រាយវិវាទនៃ អ.ដ.ក.  ចំនួន ៣ រូប រួមមាន លោក នាង សុវត្ថារ៉ា, លោក សូ សុខហុង និងលោក អេង សុគន្ធា បានសម្រុះសម្រួលដោះស្រាយបញ្ចប់ដោយជោគជ័យនូវវិវាទដីធ្លីដ៏រ៉ាំរ៉ៃ​ ១ សំណុំរឿង។ 

សំណុំរឿងនេះពាក់ព័ន្ធនឹងទំនាស់ដីសហគមន៍ រវាងប្រជាពលរដ្ឋចំនួន​ ២០​ គ្រួសារ​ និងរដ្ឋបាលឃុំ​ស្ពឺ​ក​ ស្ថិតនៅស្រុកបាភ្នំ ខេត្តព្រៃវែង។ វិវាទ​នេះបានកើតឡើងតាំងឆ្នាំ២០០៦ ហេីយបានអូសបន្លាយអស់រយៈពេល ១៨ ឆ្នាំ ដោយភាគីវិវាទម្ខាង បានធ្វើការប្តឹងតវ៉ាទៅជាច្រើនស្ថាប័នរួចមកហើយ រហូតដល់ថ្ងៃទី៨​ ខែកក្កដា ឆ្នាំ២០២៤ នេះ​ ទេីប​ ភាគីវិវាទបានដាក់ពាក្យបណ្តឹងមក អ.ដ.ក.។

អាជ្ញាធរជាតិដោះស្រាយវិវាទក្រៅប្រព័ន្ធតុលាការ បានពិនិត្យ សិក្សា ស្រាវជ្រាវដោយយកចិត្តទុកដាក់​ និងដោះស្រាយបញ្ចប់វិវាទនេះ​ ដោយផ្អែកលេីឆន្ទៈព្រមព្រៀងរបស់គូភាគី និងដោយឆាប់រហ័ស។ 

គូភាគីវិវាទបានសះជាជាមួយគ្នា និងបានផ្តិតមេដៃលេីកំណត់ហេតុព្រមព្រៀងបញ្ចប់វិវាទ  ដែលតាមច្បាប់ កំណត់ហេតុនេះមានតម្លៃអនុវត្តដូចសាលក្រមស្ថាពររបស់តុលាការ។