អគ្គនាយកដ្ឋានគយ និងរដ្ឋាករកម្ពុជា ទទួលសៀវភៅស្ដីពី "កូនប្រុសច្បងដ៏មានឥទ្ធិពល" សរុប ១ ៣០០ ក្បាល ពីឯកឧត្ដម ពៅ សុខ ទីប្រឹក្សាផ្ទាល់សម្ដេចតេជោ ហ៊ុន សែន

ភ្នំពេញ ថ្ងៃទី២៤ ខែឧសភា ឆ្នាំ២០២៣

ឯកឧត្តម ពៅ សុខ ទីប្រឹក្សាផ្ទាល់​សម្តេចអគ្គមហាសេនាបតីតេជោ ហ៊ុន សែន នាយក​រដ្ឋ​មន្រ្ដីនៃព្រះរាជាណាចក្រកម្ពុជា លោក មែ ស៊ីថុន ប្រធានសមាគមអតីតសិស្ស-និស្សិត​នៅកម្ពុជា ព្រមទាំងក្រុមការងារបាននាំយកនូវសៀវភៅស្ដីពី "កូនប្រុសច្បង​ដ៏មាន​ឥទ្ធិពល" សរុបចំនួន ១ ៣០០ ក្បាល ប្រគល់ជូនអគ្គនាយកដ្ឋានគយ និងរដ្ឋាករកម្ពុជា។ ក្នុងពិធី​ប្រគល់ និងទទួលនេះ ធ្វើឡើង កាលពីរសៀលថ្ងៃទី២៣ ខែឧសភា ឆ្នាំ២០២៣ ដោយ​មានការអញ្ជើញចូលរួមពីឯកឧត្តម បណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋ​មន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា។

ឯកឧត្តម បណ្ឌិត គុណ ញឹម ការ​ផ្តល់​សៀវភៅដ៏មានតម្លៃប្រកបដោយខ្លឹមសារ និងអត្ថន័យនៅពេលនេះ គឺពិតជាមានសារៈ​សំខាន់ខ្លាំងណាស់ ហើយឯកឧត្ដមក៏​បានថ្លែង​អំណរគុណយ៉ាងជ្រាលជ្រៅបំផុតចំពោះ ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន និងក្រុមការងារទាំងអស់ ដែល​បានផ្តល់សៀវភៅបែបប្រវត្តិសាស្ត្រ​ដ៏មានតម្លៃ​នេះ។ ឯកឧត្តមបណ្ឌិតបានបញ្ជាក់ថា ឯកឧត្ដមនឹងនាំយក​សៀវភៅ​ប្រកបដោយគុណ​តម្លៃ​នេះ ទៅចែកជូនដល់មន្ត្រីនៃអគ្គនាយកដ្ឋានគយ និងរដ្ឋាករកម្ពុជា និងតម្កល់ទុកនៅបណ្ណា​ល័យសាលាជាតិគយ នៃអគ្គនាយកដ្ឋានគយ និងរដ្ឋាករកម្ពុជា ដើម្បីជាមូលដ្ឋានឱ្យមន្ត្រី និងសិស្ស និស្សិតឈ្វេងយល់ឱ្យកាន់តែច្បាស់អំពី​ប្រវត្តិសាស្រ្ត​ពិត ស្នាដៃ និងសមិទ្ធផល​របស់សម្តេចតេជោ សម្តេចកិត្តិព្រឹទ្ធបណ្ឌិត និងឲ្យកាន់តែយល់ច្បាស់អំពីតួអង្គជាបេក្ខភាព​នាយករដ្ឋមន្ត្រីបន្តវេននាពេលអនាគតផងដែរ។

ឯកឧត្តមបណ្ឌិតរដ្ឋមន្រ្ដីប្រតិភូអមនាយក​រដ្ឋ​មន្រ្ដីក៏បានយកឱកាសនោះគោរពថ្លែង​អំណរគុណ និងដឹងគុណដ៏ជ្រាលជ្រៅជាទី​បំផុតចំពោះ សម្ដេចតេជោ ហ៊ុន សែន នាយក​រដ្ឋមន្ត្រី សម្តេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តមបណ្ឌិត ហ៊ុន ម៉ាណែត ដែលបានផ្ដល់ឯកសារ និងបទសម្ភាសន៍ដល់ក្រុមការងារ​ចង​ក្រងសៀវភៅ រហូតក្រុមការងារអាចចងក្រងបានជាសៀវភៅប្រវត្តិសាស្ត្រដ៏​មានសារៈ​សំខាន់ទាំងនេះទុកសម្រាប់ជាកេរមរតកដល់កូនចៅខ្មែរតគ្រប់ៗជំនាន់តរៀងទៅ ។

ក្នុងឱកាសនោះដែរ ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន សមាជិកក្រុមប្រឹក្សាសមាគមអតីតសិស្ស-និស្សិតនៅកម្ពុជា និងជាប្រធានក្រុមការ​ងារ​សៀវ​ភៅបានលើកឡើងថា ការរៀបចំចងក្រងជាសៀវភៅខាងលើនេះ គឺដើម្បីតម្កល់ទុក​ជាឯកសារ សម្រាប់ប្រជាពលរដ្ឋទូទៅ និងយុវជនជំនាន់ក្រោយបានសិក្សាឈ្វេងយល់​អំពី​ប្រវត្តិសាស្ត្រ និងសមិទ្ធផលពិតរបស់ថ្នាក់ដឹកនាំ។ ឯកឧត្តមបានថ្លែងថា សៀវភៅ "កូន​ប្រុសច្បងដ៏មានឥទ្ធិពល" បង្ហាញពីវីរភាព និងគុណបំណាច់របស់ ឯកឧត្តមបណ្ឌិត ហ៊ុន ម៉ាណែត ដែលបានលះបង់ពេលវេលា កម្លាំងកាយចិត្ត ប្រាជ្ញាស្មារតី និងអ្វីៗទាំងអស់ ចំពោះជាតិ សាសនា ព្រះមហាក្សត្រ ជាពិសេសក្នុងយុទ្ធនាការប្រយុទ្ធប្រឆាំងកូវីដ១៩ នាពេល​កន្លងមក ។ ឯកឧត្តមបានថ្លែងបញ្ជាក់ថា សៀវភៅ "កូនប្រុសច្បងដ៏មានឥទ្ធិពល" នឹងផ្តល់ជូនរដ្ឋបាលរាជធានី ខេត្តទាំង ២៥ និងបណ្ណាល័យ នៃវិទ្យាល័យទូទាំងប្រទេស ហើយនៅថ្ងៃនេះ គឺក្រុមការងារសៀវភៅបានបញ្ចប់បេសកកម្មទាំង ២៥ រាជធានី ខេត្ត ដោយ​ជោគជ័យ និងរលូន ។

ឯកឧត្តម ពៅ សុខ ក៏បានលើកឡើងអំពីគោលការណ៍ បេសកកម្ម និងចក្ខុវិស័យ​របស់សមាគមអតីតសិស្ស-និស្សិតនៅកម្ពុជា ដោយចូលរួមលើកស្ទួយវិស័យអប់រំ និងការ​ពារ​គុណភាពបរិស្ថាននៅកម្ពុជា។ ឯកឧត្តមបានបន្ថែមថា សមាគមបានធ្វើសកម្មភាព​បេស​កកម្មរបស់​ខ្លួននៅក្នុងខេត្ត រាជធានីចំនួន២៥ ហើយសមាគមមានបំណង​ចង់ពង្រីក​វិសាលភាពការងារ និងបេសកកម្មរបស់ខ្លួនឱ្យបានទូទាំងប្រទេសនាពេលអនាគត៕​